1 · مين إحنا
ModeerCOD تطبيق ويب لتجار الدفع عند الاستلام (COD). بيربط منصة متجرك (Shopify أو WooCommerce أو EasyOrders أو Lightfunnels)، وشركة الشحن (Bosta أو Turbo)، وحساب إعلاناتك (Meta أو TikTok)، وواتساب، وGoogle Sheets لو حبيت — وبيسيبك تدير طلباتك من أول التأكيد لحد ما الكاش يوصلك، وبيحسبلك ربحك الصافي الحقيقي بعد المرتجعات والشحن والإعلانات. عشان نعمل ده، لازم نقرا بيانات من الحسابات اللي بتربطها بينا، ونكتب عندها في الحدود اللي السياسة دي بتوضّحها — والسياسة دي بتشرح كل تفصيلة في الموضوع ده.
المسؤول عن معالجة البيانات: ModeerCOD — للتواصل في أي أمر يخص الخصوصية: privacy@modeercod.com
2 · البيانات اللي بنجمعها
أ. بيانات حسابك
اسمك، بريدك الإلكتروني، رقم تليفونك، واسم متجرك، وبيانات نشاطك اللي بتدخّلها وإنت بتجهّز حسابك (زي الدولة والعملة والمنطقة الزمنية ونوع منتجاتك وحجم طلباتك الشهري وعرفتنا منين). لو سجّلت بحساب Google، بناخد اسمك وإيميلك ومعرّف حسابك على Google. ولو نزّلت التطبيق من متجر تطبيقات Shopify، حسابك بيتعمل أوتوماتيك بإيميل المتجر. والدولة اللي بتسجّل منها بنعرفها من عنوان الـIP عشان نظبط العملة والإعدادات الافتراضية. كلمة المرور بتتخزّن مشفّرة (hash) ومحدش عندنا يقدر يشوفها.
ب. بيانات متجرك (عبر التكاملات)
- من منصة متجرك (Shopify أو WooCommerce أو EasyOrders أو Lightfunnels): الطلبات (رقم الطلب، القيمة، الخصومات، المرتجعات، طريقة الدفع، الحالة، تاريخ الإنشاء، وبيانات العميل اللي على الطلب)، ومصدر الطلب (صفحة الهبوط والـReferrer وروابط الـUTM) عشان نربطه بحملاتك، والمنتجات والـSKUs والمخزون.
- من شركة الشحن (Bosta أو Turbo): الشحنات وحالتها ومحاولات التسليم، وحالات التحصيل ومبالغ الـCOD، ومرتجعات الـRTO، ودورات التوريد — ومن Bosta كمان حركات محفظة النشاط. ربط Bosta بيتم بإيميل وكلمة سر لوحة Bosta (وكود التحقق لو اتطلب)، وبيعدّوا على سيرفرنا مرة واحدة بس عشان ناخد مفتاح جلسة — مش بنخزّن كلمة السر، بنخزّن مفتاح الجلسة مشفّر.
- من Meta و TikTok: بيانات الحملات — الإنفاق والنتائج والإيراد المُبلَّغ — وأسماء الإعلانات وحالتها وروابطها عشان نراجع روابط الـUTM. مش بنسحب جمهورك ولا بيانات الناس اللي شافت إعلاناتك.
- من Google Sheets: لو ربطت حساب Google، بنوصل بس للشيتات اللي إنت بتختارها بنفسك — وبنقرا منها طلباتك لو الشيت هو مصدر طلباتك. راجع القسم 5 لتفاصيل بيانات مستخدمي Google.
- من واتساب: لو ربطت رقمك، بنستقبل الرسايل الفردية اللي بتوصله (نص الرسالة، ورقم المرسل واسمه على واتساب)، وحالة الرسايل اللي بنبعتها نيابة عنك. راجع القسمين 4 و10.
- منك مباشرة: تكاليف المنتجات اللي بتدخّلها في شاشة Costs، يدوي أو برفع ملف Excel/CSV، وأي ملاحظات أو إعدادات بتحفظها جوه التطبيق.
ج. بيانات مشتريينك
بيانات الطلب بتتضمّن اسم العميل ورقم تليفونه وإيميله وعنوانه ومدينته وملاحظات الطلب. بنستخدمها في: تشغيل طلبه وشحنه — وده بيشمل إننا نبعت اسمه وتليفونه وعنوانه ومبلغ التحصيل لشركة الشحن لما تحجز الشحنة — وحساب Buyer Risk Score، وإرسال رسائل واتساب نيابة عنك لو فعّلت الميزة دي: رسالة تأكيد الطلب، ولو شغّلتها، لحد 4 رسائل متابعة على طول رحلة الشحن (تم الشحن، خارج للتوصيل، فشلت محاولة التسليم، والطلب راجع). الـBuyer Risk Score بيتحسب من تاريخ العميل ده مع متجرك (اتسلّم ولا رجع)، ونسبة المرتجعات في مدينته عندك، وقيمة الطلب مقارنةً بمتوسط متجرك، واكتمال التليفون والعنوان، والطلبات المكرّرة. راجع القسم 10 للتفاصيل الكاملة.
د. بيانات الاشتراك
باقتك وحالة اشتراكك وتواريخ التجديد وعدد طلباتك في الفترة. الدفع بيتم عن طريق Stripe: بيانات بطاقتك بتتكتب في صفحة Stripe نفسها ومش بتعدّي على سيرفراتنا — إحنا بنحتفظ بس بمعرّف حسابك ووسيلة الدفع عند Stripe (مشفّر)، ونوع البطاقة وآخر 4 أرقام منها عشان نعرضهملك، وبنبعت لـStripe إيميلك. عملة الاشتراك بتتحدّد حسب الدولة اللي بتتصفح منها (بنعرفها من عنوان الـIP عن طريق Cloudflare): بالجنيه جوه مصر، وبالدولار برّه. ولو نزّلت التطبيق من متجر تطبيقات Shopify، ممكن الاشتراك يتحصّل من خلال Shopify Billing على فاتورة Shopify.
هـ. بيانات الاستخدام وسجل النشاط والمفاتيح
بنسجّل تسجيلات الدخول والأجهزة (اسم الجهاز ونوع المتصفح وعنوان الـIP)، والصفحات اللي بتتفتح، وكل تعديل بيتعمل في الحساب (مين عمله وإمتى، والقيمة قبل وبعد) في سجل نشاط — للأمان والمراجعة واكتشاف الأعطال. صاحب المتجر والأدمن يقدروا يشوفوا سجل نشاط فريقهم، بما فيه عنوان الـIP والجهاز. وبنستخدم أدوات تحليلات بتسجّل إزاي بتستخدم التطبيق والموقع (الصفحات والضغطات وتسجيلات للجلسات) عشان نحسّنهم — راجع القسمين 6 و11. ومفاتيح التكاملات (API Keys وTokens) بتتخزّن مشفّرة.
و. بيانات فريقك
لما تدعو حد من فريقك، بنخزّن إيميله والدور اللي اخترته له ومين اللي دعاه. الدعوة بتتبعت كرابط إنت بتشاركه بنفسك، وصلاحياته جوه التطبيق بتتحدد بالدور ده.
ز. الدعم والملاحظات
رسايل الدعم اللي بتبعتها من جوه التطبيق بتتخزّن عندنا وبيقراها فريق الدعم. والملاحظات والتقييمات اللي بتبعتها بتوصل لفريقنا ومعاها إيميلك ودومين متجرك والصفحة اللي كنت فيها. ولو احتاج فريق الدعم يدخل حسابك عشان يحل مشكلة، الدخول ده بيتسجّل في سجل النشاط.
3 · ليه بنجمع البيانات دي
- تنفيذ العقد: تشغيل الخدمة اللي اشتركت فيها — إدارة طلباتك وتأكيدها وشحنها، وحساب الربح والـROAS الحقيقي، وعرض حالة الشحن والتحصيل.
- المصلحة المشروعة: تأمين المنصة، ومنع إساءة الاستخدام، واكتشاف الأعطال، وتحليل طريقة استخدام الموقع والتطبيق عشان نحسّنهم.
- موافقتك: إرسال رسائل واتساب لعملائك (بتفعيلك أنت للميزة)، وأي رسائل تسويقية بتوصلك مننا — وتقدر توقفها في أي وقت.
- التزام قانوني: حفظ الفواتير والسجلات المحاسبية للمدة اللي بيفرضها القانون.
حاجات مش بنعملها إطلاقًا: مش بنبيع بياناتك ولا بيانات عملائك لأي طرف. مش بنستخدمها لتدريب نماذج ذكاء اصطناعي. ومش بنستخدم بيانات تاجر لخدمة تاجر تاني.
4 · التكاملات والأطراف الخارجية
الخدمة بتشتغل من خلال الاتصال بالحسابات اللي بتربطها بنفسك. كل تكامل بياخد الصلاحيات اللي محتاجها بس، وتقدر تفصله في أي وقت من صفحة Settings:
| الطرف | بنقرا منه إيه | بنكتب عنده حاجة؟ |
|---|---|---|
| Shopify · WooCommerce · EasyOrders · Lightfunnels | الطلبات وبيانات العميل اللي عليها، المنتجات والمخزون | أيوه، في حدود: تسجيل Webhooks عشان الطلبات توصلنا لحظيًا، وتاج أو ملاحظة على الطلب بحالة تأكيد واتساب، وإلغاء الطلب (مع رجوع الكمية للمخزون) — بأمرك، أو أوتوماتيك لو العميل رفض الطلب في رسالة التأكيد على واتساب |
| Bosta · Turbo | حالة الشحنات ومحاولات التسليم، التحصيل، مرتجعات RTO، دورات التوريد، وحركات محفظة Bosta | أيوه — بأمرك: حجز الشحنة (وبيتبعت فيها اسم العميل وتليفونه وعنوانه ومبلغ التحصيل)، وطباعة البوالص، وإلغاء الشحنة على Bosta |
| Meta · TikTok | إنفاق ونتائج الحملات، وأسماء الإعلانات وروابطها لمراجعة الـUTM | لأ — قراءة فقط |
| Google Sheets | الشيتات اللي إنت بتختارها بس — كمصدر لطلباتك | لأ — قراءة فقط |
| الرسايل الفردية اللي بتوصل رقمك المربوط (النص، ورقم المرسل واسمه) — عشان نوصّلك ردود عملائك ونعرض محادثاتك في صندوق الوارد | أيوه — رسائل التأكيد ومتابعة الشحن نيابة عنك، وردودك من صندوق الوارد، وتنبيهات الإعلانات على رقمك إنت | |
| Stripe · Shopify Billing | حالة دفع اشتراكك | تحصيل الاشتراك والتجديد والطلبات الزيادة |
ربط واتساب بيتم برقمك كجهاز مرتبط (زي واتساب ويب) عن طريق كود QR أو كود ربط، والجلسة دي بتفضل شغّالة على خادم الربط بتاعنا لحد ما تفصلها من Settings أو من واتساب نفسه.
كل طرف من دول عنده سياسة خصوصية خاصة بيه بتحكم تعامله مع بياناتك على منصته هو، وبننصحك تراجعها.
5 · بيانات مستخدمي Google
ModeerCOD بيستخدم بيانات من Google في حالتين، وكل واحدة بموافقتك:
- تسجيل الدخول بـGoogle: بناخد اسمك وإيميلك ومعرّف حسابك على Google عشان نعمل حسابك ونسجّل دخولك.
- تكامل Google Sheets: بنطلب صلاحية
drive.fileبس — يعني بنوصل للملفات اللي إنت بتختارها بنفسك من نافذة الاختيار بتاعة Google، ومش بنشوف أي ملف تاني في Google Drive بتاعك. بنقرا الشيت ده عشان نسحب منه طلباتك ونزامنها، وبنخزّن إيميل حساب Google ومعرّفه ومفتاح التحديث (Refresh Token) مشفّر.
بنستخدم البيانات دي لتقديم الوظايف دي بس، ومنها استيراد ومزامنة بيانات العمل اللي بتستخدمها جوه ModeerCOD.
ModeerCOD مش بيبيع بيانات مستخدمي Google، ومش بيستخدمها لأغراض إعلانية، ومش بيستخدمها لتدريب نماذج ذكاء اصطناعي. ومحدش من فريقنا بيقرا محتوى الشيتات بتاعتك إلا بطلبك (زي لما تطلب مساعدة من الدعم)، أو لأسباب أمنية، أو لو القانون طلب ده.
مفاتيح الوصول (Access Tokens) وبيانات اعتماد التكامل بتتخزّن مشفّرة، وبتُستخدم بس لتقديم الوظيفة المطلوبة.
الاستخدام المحدود: استخدام ModeerCOD للمعلومات المستلمة من واجهات Google API ونقلها بيلتزم بـسياسة بيانات مستخدمي خدمات Google API، بما في ذلك متطلبات الاستخدام المحدود (Limited Use).
تقدر تفصل حساب Google في أي وقت من صفحة Settings جوه ModeerCOD — ولما تفصله بنمسح مفتاح الوصول المخزّن عندنا — وتقدر كمان تسحب الصلاحية مباشرةً من صفحة أذونات حساب Google.
6 · مشاركة البيانات ومزوّدي الخدمة
مش بنبيع بياناتك ولا بيانات عملائك. بنشاركها في الحالات دي بس:
- مزوّدي الخدمة اللي بنشغّل بيهم المنصة: كل واحد بيوصله اللي محتاجه لدوره بس، والجدول تحت بيوضّح مين وإيه.
- التكاملات اللي بتربطها: بالبيانات اللي لازم تتبعت عشان ننفّذ أوامرك — زي بيانات العميل لما تحجز شحنة (القسم 4).
- التزام قانوني: لو طلبت جهة قضائية أو رقابية مختصة ده بشكل رسمي وملزم.
- انتقال ملكية: لو حصل اندماج أو استحواذ، هنبلّغك قبلها، وهتفضل السياسة دي سارية لحد ما تتحدّث.
| المزوّد | دوره | بيوصله إيه |
|---|---|---|
| Hetzner | استضافة قاعدة البيانات (فنلندا) | بيانات حسابك ومتجرك المخزّنة |
| Cloudflare | الشبكة والحماية للموقع والتطبيق | كل الطلبات اللي بتعدّي على الموقع والتطبيق، وعنوان الـIP |
| Stripe | تحصيل الاشتراك | إيميلك وبيانات الدفع |
| Mixpanel | تحليلات استخدام التطبيق | معرّفك واسمك وإيميلك ودورك ومتجرك، والصفحات والضغطات، وتسجيلات للجلسات |
| Microsoft Clarity | تحليلات وتسجيل جلسات | إزاي بتستخدم الموقع والتطبيق: الصفحات وتسجيلات للجلسات وخرايط الاستخدام |
| Bugsnag | رصد الأعطال | تفاصيل الخطأ، ومعرّفك واسمك وإيميلك ومتجرك ودورك |
| Discord | تنبيهات داخلية لفريقنا | اسمك وإيميلك لما تسجّل، وملخص بالعمليات اللي بتتعمل في حسابك، والملاحظات اللي بتبعتها |
| Gravatar | صورة الحساب | بصمة مشفّرة (hash) من إيميلك |
| تسجيل الدخول وGoogle Sheets، والخطوط على الموقع | اللي في القسم 5، وعنوان الـIP لما الخطوط بتتحمّل | |
| Meta | أداة تسجيل دخول Facebook في صفحات ربط حساب الإعلانات | بيانات المتصفح وعنوان الـIP في الصفحات دي |
7 · مدة الاحتفاظ بالبيانات
بنحتفظ ببيانات حسابك ومتجرك طول ما حسابك موجود — حتى لو اشتراكك وقف أو انتهى — عشان لو رجعت تلاقي أرقامك زي ما هي:
- لما تفصل تكامل: بنمسح مفاتيح الوصول بتاعته فورًا، والبيانات اللي اتزامنت قبل كده بتفضل في حسابك.
- لما صاحب الحساب يمسح الحساب من Settings: بنمسح فورًا وبشكل نهائي المتاجر اللي هو العضو الوحيد فيها وكل بياناتها. وبنحتفظ بس بسجل أمني بعملية الحذف نفسها (الإيميل وعنوان الـIP والجهاز ووقت الحذف).
- لو مسحت التطبيق من Shopify: بننفّذ طلبات الحذف اللي Shopify بيبعتها — لبيانات المتجر أو لبيانات عميل معيّن — في المواعيد اللي Shopify بيحددها.
- سجل النشاط وجلسات الدخول ورسايل الدعم ومحادثات واتساب بتفضل محفوظة طول ما الحساب موجود.
- الفواتير والسجلات المحاسبية بتتحفظ للمدة اللي بيفرضها القانون المصري، والنسخ اللي عند مزوّدي الخدمة (القسم 6) بتتمسح حسب مدة الاحتفاظ عند كل مزوّد.
وتقدر تطلب حذف بياناتك، أو بيانات عميل معيّن، في أي وقت على privacy@modeercod.com.
8 · أمان البيانات
- كل مفاتيح التكاملات بتتخزّن مشفّرة في قاعدة البيانات.
- الاتصال بين متصفحك وخدماتنا، وبين خدماتنا والتكاملات، بيتم عبر HTTPS/TLS.
- كل تكامل بياخد الصلاحيات اللي محتاجها بس، وقراءة فقط حيثما أمكن.
- الوصول الداخلي للبيانات محدود بالموظفين اللي شغلهم يتطلب ده فعلًا، وأي دخول من فريق الدعم لحسابك بيتسجّل في سجل النشاط.
- كلمات المرور بتتخزّن hash، ومش بنخزّن كلمة سر Bosta ولا بيانات بطاقتك.
مفيش نظام آمن 100%. لو حصل اختراق بيأثر على بياناتك الشخصية، هنبلّغك وهنبلّغ الجهة المختصة في المدة اللي بيحددها القانون.
9 · حقوقك على بياناتك
طبقًا لقانون حماية البيانات الشخصية المصري (رقم 151 لسنة 2020)، ليك الحقوق دي:
- الاطّلاع: تعرف إيه البيانات اللي عندنا عنك وتاخد نسخة منها.
- التصحيح: تصحّح أي بيانات غير دقيقة.
- المحو: تطلب حذف بياناتك، في حدود ما لا يتعارض مع التزام قانوني علينا — أو تمسح حسابك بنفسك من Settings.
- الاعتراض والتقييد: تعترض على معالجة معيّنة أو تطلب تقييدها.
- سحب الموافقة: في أي وقت، من غير ما يأثر ده على شرعية المعالجة قبل السحب.
- نقل البيانات: تاخد بياناتك في صيغة منظّمة وقابلة للقراءة آليًا — وكتير منها تقدر تصدّره بنفسك من التطبيق كملف CSV أو Excel.
لممارسة أي حق من دول، ابعتلنا على privacy@modeercod.com وهنرد عليك خلال 30 يوم كحد أقصى.
10 · بيانات عملائك — إنت المتحكم وإحنا المعالج
بيانات مشتريينك (الاسم، التليفون، الإيميل، العنوان، تاريخ الطلبات، ومحادثاتهم على واتساب) هي بياناتك إنت. في العلاقة دي إنت المتحكم في البيانات وإحنا المعالج اللي بيشتغل بناءً على تعليماتك.
يعني ده مسؤوليتك: إن يكون عندك الأساس القانوني لجمع بيانات عملائك، وإن سياسة الخصوصية بتاعة متجرك توضّح إنك بتستعين بمزوّدين خارجيين لتحليل الطلبات وتأكيدها وشحنها، وإن يكون عندك موافقة عملائك على استقبال رسائل واتساب — رسالة التأكيد ورسائل متابعة الشحن — قبل ما تفعّل الميزة دي. الرسائل بتتبعت من رقم الواتساب اللي إنت بتربطه، نيابة عنك.
وخلي بالك من حاجتين: بعد ما تربط رقم واتساب، أي رسالة فردية بتوصله — من عميل أو من أي حد تاني — بتتخزّن عندنا وبتظهر لفريقك في صندوق الوارد. ولو العميل رفض الطلب في رسالة التأكيد، الطلب بيتلغي أوتوماتيك في متجرك.
والتزامنا إحنا: مش بنستخدم بيانات مشتريينك لأي غرض غير تشغيل الخدمة ليك. الـBuyer Risk Score بيتحسب من تاريخ طلبات متجرك إنت لوحده — مش بيتجمّع ولا بيتشارك بين حسابات التجار المختلفين، ومش بنبيعه ولا بنبني منه قاعدة بيانات مشتركة.
11 · الكوكيز والتخزين المحلي
الكود بتاعنا على الموقع التعريفي ده بيستخدم التخزين المحلي (localStorage) لحاجة واحدة بس: إنه يفتكر اللغة اللي اخترتها. وعشان يعرض الأسعار بالعملة الصح، بيسأل Cloudflare — مزوّد الشبكة والحماية بتاعنا — عن الدولة اللي بتتصفح منها بناءً على عنوان الـIP؛ الدولة دي بتُستخدم جوه المتصفح بس عشان نختار بين الجنيه والدولار، ومش بنخزّنها. والخطوط بتتحمّل من Google Fonts، فـGoogle بيوصله عنوان الـIP لما الصفحة تفتح.
وبنستخدم كمان Microsoft Clarity على الموقع التعريفي عشان نفهم الناس بتستخدمه إزاي ونحسّنه. Clarity بيستخدم كوكيز من الطرف الأول والطرف التالت عشان يسجّل الصفحات والضغطات وتسجيلات للجلسات (Session Replay) وخرايط الاستخدام. واللي بتكتبه في خانات الإدخال بيتخفي، فمش بيظهر في التسجيلات. إحنا مش بنشغّل أدوات إعلانية خاصة بينا على الموقع، لكن كوكيز الطرف التالت اللي Clarity بيحطها فيها كوكيز تبع Microsoft زي MUID، واللي Microsoft بتقول إنها بتُستخدم للإعلانات وتحليلات المواقع وأغراض تشغيلية تانية. تقدر تعرف أكتر من بيان الخصوصية بتاع Microsoft.
أما التطبيق نفسه (app.modeercod.com) فبيستخدم:
- كوكيز ضرورية: كوكي تسجيل الدخول (
refresh_token، صالحة 30 يوم)، وكوكيز مؤقتة لتسجيل الدخول بـGoogle (10 دقايق). من غيرها مش هتقدر تفضل مسجّل دخول. - التخزين المحلي في المتصفح: لمفاتيح الجلسة وتفضيلاتك (المتجر الحالي، اللغة، طريقة الحساب، والمسودات).
- أدوات تحليلات: Mixpanel وMicrosoft Clarity — بيستخدموا كوكيز وتخزين محلي عشان يسجّلوا الصفحات والضغطات وتسجيلات للجلسات (Session Replay) وخرايط الاستخدام، عشان نفهم الناس بتستخدم التطبيق إزاي ونحسّنه.
- خدمات تانية: صورة حسابك بتتجاب من Gravatar، وصفحات ربط حساب الإعلانات بتحمّل أداة تسجيل دخول Facebook.
12 · نقل البيانات خارج مصر
قاعدة البيانات الأساسية مستضافة على سيرفرات Hetzner في فنلندا (الاتحاد الأوروبي). وبعض مزوّدي الخدمة اللي في القسم 6 — زي Cloudflare وStripe وMixpanel وMicrosoft وBugsnag وDiscord وGoogle — بيعالجوا البيانات في الولايات المتحدة أو في دول تانية. في الحالات دي بنعتمد على ضمانات مناسبة زي البنود التعاقدية القياسية اللي بيقدّمها المزوّدين دول، وبما يتوافق مع متطلبات القانون المصري بخصوص النقل عبر الحدود.
13 · الأطفال
الخدمة موجّهة للشركات والتجار، مش للأفراد أقل من 18 سنة، وإحنا مش بنجمع بيانات أطفال عن قصد. لو اكتشفنا إن حساب اتعمل بالمخالفة لده، هنقفله ونمسح بياناته.
14 · تعديلات على السياسة
ممكن نحدّث السياسة دي مع تطوّر المنتج أو تغيّر المتطلبات القانونية. أي تحديث بيظهر على الصفحة دي مع تعديل تاريخ آخر تحديث فوق، ولو التغيير جوهري (زي إضافة غرض جديد للمعالجة) هنبلّغك بالإيميل أو جوه التطبيق قبل ما يسري.
15 · تواصل معانا
أي سؤال أو شكوى أو طلب بخصوص بياناتك: